السلام عليكم ورحمة الله وبركاته..
كثر السؤال ده...
انا جهازى يشيل كام عميل؟....او البيكو و البوليت يشيل كام عميل معايا؟...
والمهندس خالد بصراحة فى احد ردوده وضع الاجابة الشافية الكاملة للموضوع ده وانا قلت تشوفوها وتفهموها..
السلام عليكم
سؤال بتسأله كتير جدا من الناس اصحاب الشبكات اللاسلكية وهو
الجهاز دا يشيل كام عميل ؟؟
بسمع اجابات من ناس على السؤال دا غريبة زي مثلا ان البوليت او البيكو ستيشن بيشيل من 25 : 30 عميل اونلاين
الحقيقة فكرة السؤال دا غلط من الاساس .. ليه غلط ؟ لان مفيش عدد عملاء محدد للجهاز اي كان نوع الجهاز.
امال ايه ؟؟
كل جهاز له قدرة معينة على نقل البيانات على حسب المود والتردد اللي هو شغال عليهم وهناخد البيكو ستيشن كمثال نشرح عليه
جهاز زي البيكو ستيشن معظم الناس بتستخدمه يبث على المود b وطبعا هو بيعمل على التردد 2.4 وفي الحالة دي بيكون قدرة البيكو
على نقل البيانات 11mbps
يعني ايه mbps دي ؟؟
دي يعني Mega Bit Per Second
بالعربي ميجا بت لكل ثانية
خدت بالك من حاجة ؟؟
انا قولت ميجابت مش ميجا بايت .. يعني ايه الكلام دا ؟؟
سرعة الانترنت بتتقاس بالكيلوبت مش بالكيلوبايت ودا خطأ شائع ان الناس تقول سرعة النت مثلا 512 كيلو بايت او 2 ميجا بايت لا
هي ميجا بت
طيب تفرق ايه ياعم ميجا بت من ميجابايت او كيلو بت من كيلوبايت ؟؟
تفرق ان الكيلو بايت = 8 كيلو بت
والميجابايت = 8 ميجابت
ايوه برده يعني عايز ايه
يعني عايز اقولك ان عشان تحسب سرعة نقل البيانات او Data Rate اللي هي بنحسبها بالكيلوبايت او الميجابايت هتقسم على 8
يعني ايه برده مش فاهم ؟؟
يعني الـ 11 ميجابت اللي هما سرعة نقل البيانات بتوع البيكو دول على المود b اما احب اطلع منهم قدرة البيكو على نقل البيانات
بالميجابايت هقسم على 8
يعني ايه الكلام دا ؟؟
يعني الداتاريت بتاعة البيكو لو جيت تحسبها بالكيلو بايت يبق هنقسم
(11 اللي هي سرعة نقل البيانات في البيكو بالميجابت في الثانية) / (8 عشان احول من ميجابت لميجابايت= 1.357 ميجابايت
يعني على كدا لو انا جيت اعمل داونلود من جهاز بيكو ستيشن على المود b وسرعة نقل البيانات فيه 11 ميجا بت مش هيعمل معايا
داونلود كدا ادامي بسرعة 11 ميجا ؟
لا طبعا ليه لان زي ما قولنا دول 11 ميجا بت واحنا بنحسب بالميجابايت والميجابايت = 8 ميجابت يعني 11 / 8 = 1.357 ميجابايت
امال انت فاكر ليه سرعة النت اللي بتاخدها من الشركة بتبقى جوه الروتر مثلا 1024 وتيجي تحمل تديك 128 كيلوبايت في الثانية
وليه الـ 512 تديك 64 كيلو في الثانية .. لان انت بتاخد من الشركة 1024 ميجابت مش بايت وبالتالي سرعة نقل البيانات بالميجابايت
هتبقى 1024 / 8 = 128 كيلوبايت او 512 / 8 = 64
واحد هيقولي انا الواحد ميجا او الـ 1024 الاتنين واحد على فكرة مش بتجيب معايا 128 والـ 512 مش بتجيب 64 بيبقوا اقل من كدا
ليه ؟؟
اقولك عشان فيه نسبة فقد ومقاومة في الاسلاك اللي جايلك فيها النت فطبيعي ان السرعة توصلك اقل شوية
طيب دلوقتي احنا دخلنا في وجع دماغ كتير كدا ليه وفين اجابة السؤال اصلا بتاع الجهاز يشيل كام عميل ؟؟
اقولك وجع الدماغ الي فات دا كله عشان انا عاوزك تفهم مش تحفظ وتبقى اخد المعلومة على اساس علمي وتبقى عارف العملية ماشية
ازاي
ومطلوب منك تعرف من الكلام اللي فات دا ان الـ 11 ميجابت بتوعنا على المود b هيدوني سرعة نقل 1.357 ميجا بايت يعني قول
ميجابايت وربع بالتقريب
يعني انا لو روحت عند عميل وجيت احمل هيوصلني 1 وربع ميجا بايت هناك ؟؟
طبعا لأ لانك نسيت ان في نسبة فقد كمان بسبب العوامل الجوية والعوائق وقوة الاشارة وجودة التوصيل بينك وبين العميل
يعني ايه يعني الميجابايت وربع دول هيقلوا كمان ولو روحت عند عميل وانت على المود b وجيت تجرب سرعة نقل البيانات هتلاقيها
اقل من 1 ميجابايت في الثانية يعني 700 او 800 او 900 كدا
يعني بعد الكلام الكتير بتاعنا دا في الاخر وصلنا لان الجهاز بتاعي على المود b اخره 1ميجابايت وكمان مش هيجيبهم اقولك ايوه
بالظبط كدا
بس برده كدا ما عرفناش الجهاز بتاعي يشيل كام عميل ؟؟
هقولك الجهاز بتاعك يشيل لحد ما العملاء بتوعك يتخطوا قدرته على نقل البيانات
يعني ايه برده ؟
يعني انت عندك جهازك دلوقتي بينقل بسرعة ولنفرض 1000 كيلو بايت بعد فقد جزء من قدرته بسبب العوامل الجوية والعوائق والكلام
دا
ملحوظة قبل ما اكمل الـ 1000 كيلو بايت يعني 1 ميجابايت تقريبا لان الميجابايت = 1024 كيلو بايت
طيب دلوقتي بعد ما عرفت ان متوسط قدرة جهازي على نقل البيانات في الثانية الواحدة 1000 كيلو بايت اعمل ايه
اقولك تشوف انت محدد لكل عميل سرعة كام ولنفرض انك محدد سرعة 512 لكل عميل
يعني العميل دا يقدر يحمل بـ 64 كيلو بايت طبعا قسمنا الـ 512 على 8 عشان احول من بت لبايت
يبقى دلوقتي جهازي دا يقدر يشتال كام عميل في الحالة دي ؟؟
معانا سرعة نقل بيانات 1000 كيلوبايت ومعانا سرعة العميل 64 كيلو بايت
يبقى 1000 / 64 = 15.625 .. قول 16 بالتقريب
ايه دا يعني انا جهاز اللاسلكي بتاعي ما يقدرش يشيل غير 16 عميل بس .. هقولك اه بس اذا تحقق هذا الشرط
ان الـ 16 عميل كل واحد فيهم يسحب الـ 64 كيلو بتوعه في نفس الثانية في الحالة دي هيبقى اجمالي سحب الـ 16 عميل 1000 كيلو في
الثانية
ودا معناه اننا وصلنا للحد الاقصى لقدرة الجهاز لنقل البيانات على المود b وفي الحالة دي يتوقف الجهاز عن نقل اي بيانات اخرى
بس تفائل عموما من الصعب ان الـ 16 عميل يدخلوا يسحبوا سرعتهم في نفس فانت تقدر تضيف 30 او 40 عميل المهم ما يكونش عندك
16 عميل بيحملوا في نفس الثانية مع بعض بسرعة 64 كيلوبايت
طيب هل الـ 16 عميل دول ثابتين ؟؟
هقولك لأ لان بيختلف العدد على حسب السرعة اللي انت محددها لكل عميل
يعني واحد محدد شبكته كلها 256 يعني 32 كيلوبايت عالثانية
والجهاز افترضنا انه هينقل بـ 1000 كيلو في الثانية
يبقى 1000 / 32 = 31.25 يعني 31 عميل يسحبوا كامل سرعتهم في نفس الثانية
واحد تاني محدد سرعة العملاء 1024 يعني 128 كيلوبايت عالثانية
يبقى 1000/ 128 = 7.8125 يعني بالتقريب 8 عملاء يسحبوا كامل سرعتهم في نفس اللحظة
-----------------------------------------------
وادي اجابة السؤال البسيط جهازي يشتال كام عميل
فالمرة الجاية اما تيجي تسأل السؤال دا احسبها مع نفسك وشوف
جهازك يقدر ينقل اد ايه بالميجابايت او الكيلوبايت في الثانية
وانت محدد سرعات ايه لكل عميل ويقدر يحمل بكام كيلوبايت في الثانية
واقسم قدرة الجهاز / سرعة نقل العميل بالكيلوبايت في الثانية هيطلعلك جهازك يتحمل كام عميل بشرط انهم يسحبوا كل سرعته مع بعض
في الثانية الواحدة
والشرط دا صعب انه يتحقق شوية لان لو في ثانية واحدة فرق بين كل عميل وعميل الشرط مش هيتحقق لان الجهاز اللي بيرسل هيجدد
قدرته على نقل البيانات مرة اخرى
يعني لو طلع جهازك يتحمل 10 عملاء خليهم 20 عميل عادي ولو يتحمل 15 خليهم 30 برده عادي
حد فهم اي حاجة ؟؟؟
تعليقات
إرسال تعليق